Şöhrəti hər yana yayılan məşhur Gəncə limonu - Baku TV

Dadı, ətri və keyfiyyəti ilə Ordubad limonundan geri qalmayan Gəncə limonu bölgədə həm də "lumu" adı ilə tanınır. Hazırda Gəncədə bu meyvəni becərənlərin sayı azalsa da, Məmmədovlar ailəsi təxminən 200 ildir ki, bu ənənəni yaşadır.

Məmmədcəfər Məmmədov bildirib ki, bu limon növü onlara babalarından miras qalıb.

"Gəncə lumusu keyfiyyətinə görə Ordubad limonundan heç də geri qalmır, hətta bəzi xüsusiyyətlərinə görə ondan üstündür. Əsas fərqi ondadır ki, bu meyvədə kəskin turşuluq yoxdur və ətri çox güclüdür, birini kəsəndə ətri bütün evi bürüyür", – deyə o əlavə edib.

Məmmədovun sözlərinə görə, bu ağac olduqca həssasdır və xüsusi qulluq tələb edir. Meyvələr ağacın üstündə 2-3 il qala bilir ki, bu da onun daha da iriləşməsinə və keyfiyyətinin artmasına səbəb olur.

Təsərrüfat sahibi vurğulayıb ki, bu məhsul satış məqsədilə deyil, ailə ənənəsi kimi qorunub saxlanılır:

"Biz bu limonu bazara çıxarmırıq. Lakin müalicəvi əhəmiyyətinə görə həkim məsləhəti ilə müxtəlif rayonlardan gəlib bizdən tək-tək alanlar olur. Hətta vaxtilə bir ədədini 10 manata, ağacını isə 200 manata alanlar da olub. Bu irsi yaşatmağı özümüzə mənəvi borc bilirik".