Ana dilimizi niyə ikinci plana atırıq? | Paytaxt sakinlərinin fikirləri - Baku TV

Son illər valideynlər arasında yayılan bir tendensiya ciddi qınaq obyektinə çevrilməyə başlayıb. Belə ki, uşaqlar ana dilini tam mənimsəməmiş onların xarici dil öyrənməyə cəlb edilməsi halları artıb. Bəzi valideynlər bunu kiçik yaşda dil öyrənməyin daha effektiv olması və gələcəkdə iş tapmaq imkanlarının genişlənməsi ilə əsaslandırsalar da, ekspertlər fərqli mövqedədirlər.

Mütəxəssislər xəbərdarlıq edirlər ki, uşaq ana dilində baza formalaşdırmadan xarici dilə yönləndirilərsə, bu onun həm nitq inkişafına, həm də psixologiyasına mənfi təsir göstərə bilər. Bu prosesdə əsas şərt uşağın yaşına uyğun metodların seçilməsi və ana dilinin heç vaxt arxa plana keçirilməməsidir.

Təhsil üzrə ekspert Elmin Nurizadənin sözlərinə görə, pedaqogikanın hər yaş dövrünə uyğun xüsusi tələbləri və fərdin şəxsiyyət kimi formalaşma mexanizminin meyarları var:

“Azyaşlı uşaq şəxsiyyətə doğru ilkin addımlarını atarkən bünövrəni qurmaq üçün, ilk növbədə, oxuyub-anlama prinsiplərini önəmsəməlidir. Bu inkişaf isə şüuraltı proses olaraq doğma dildə baş verir. Əgər bu mərhələdə şagirdi xarici dillə yükləsək, bu, müəyyən fayda versə də, bir çox məsələdə neqativ fəsadlarını göstərəcək”.

Bəs ana dilinin qorunması və təbliği istiqamətində hansı işlər görülür?

Məsələ ilə bağlı Elm və Təhsil Nazirliyindən qeyd olunub ki, son illərdə hazırlanmış dərsliklər Azərbaycan dilinin zənginliyini, ifadə imkanlarını və milli-mədəni xüsusiyyətlərini şagirdlərin yaş səviyyəsinə uyğun mətnlərlə təqdim edir:

“Eyni zamanda digər dillərdə tədris aparılan siniflərdə də müəyyən fənlərin dövlət dilində tədrisi Azərbaycan dilinin dövlətçilik rəmzi kimi istifadəsinin genişləndirilməsi, bu dildə təhsil alan şagirdlərdə Azərbaycan dilinə, ölkənin tarixinə və milli dəyərlərinə hörmət hissinin formalaşdırılması məqsədi daşıyır. Bu istiqamətdə əlavə olaraq həmin siniflərdə dərsdənkənar məşğələlər üçün ayrılan həftəlik saatlardan biri “Azərbaycan dili – dövlət dili kimi” fənninə verilib”.