Sonuncu buraxılış imtahanı keçirildi | DİM-dən vacib məlumat

“Dövlət İmtahan Mərkəzi ümumi (9 illik) orta təhsil səviyyəsi üzrə sonuncu buraxılış imtahanı keçirib. İmtahanda 46 169 şagirdin iştirakı gözlənilirdi”.

Bu barədə Baku TV-yə açıqlamasında DİM-in sektor müdiri Xanlar Xanlarzadə məlumat verib.

Bildirilib ki, imtahanda 17 nəfər sağlamlıq imkanları məhdud (gözdən əlil, serebral iflic, eşitmə əngəlli və digər) şagird də iştirak edib:

“Bu şagirdlərin rahat şəkildə imtahan verməsi üçün imtahan binalarında xüsusi zallar ayrılıb, orqanizmin funksiyalarının 81-100 faiz pozulmasına görə gözdən əlilliyi müəyyən edilmiş şəxslərə isə fərdi nəzarətçilər təyin edilib.

İlkin məlumatlara əsasən, 2 nəfərdə mobil telefon aşkarlandığı, 1 nəzarətçi isə köçürməyə şərait yaratdığı üçün imtahandan kənarlaşdırılıb. Baş verən qayda pozuntuları protokollaşdırılıb və araşdırma aparılacaq. Bu gündən etibarən DİM-də imtahan protokollarının və cavab vərəqlərinin emalına başlanılacaq”.

Qeyd edilib ki, imtahanda istifadə olunan yazılı cavab tələb edən açıq tipli tapşırıqların yoxlanılması vaxt tələb etdiyindən nəticələrin yaxın 4 həftə ərzində elan olunması nəzərdə tutulur.

İmtahan başa çatdıqdan sonra iştirakçılara sual kitabçalarını özləri ilə aparmağa icazə verilib. İmtahanda istifadə edilmiş test tapşırıqlarının (qapalı və kodlaşdırıla bilən açıq tipli) düzgün cavabları aprelin 21-i gün ərzində Dövlət İmtahan Mərkəzinin saytına yerləşdiriləcək.