Streslə necə mübarizə aparmaq lazımdır? | Sakitləşməyin müxtəlif yolları açıqlandı

Streslə necə mübarizə aparmaq lazımdır?

Rusiyalı psixoloq Yelena Qorelova streslə mübarizənin effektiv strategiyalarından danışıb.

İlk növbədə emosiyaları idarə etməyi öyrənmək və dincələ bilməyin yollarını tapmaq vacibdir. Y.Qorelovanın fikrincə, stres yaşadığınız üçün özünüzü mühakimə etməsəniz, ona qalib gələ bilərsiniz.

“Daxili reaksiyalarınızı başa düşmək psixo-emosional vəziyyətinizi yaxşılaşdırmaq yolunda mühüm elementdir”, – deyə psixoloq vurğulayıb.

Fiziki fəaliyyət, meditasiya və yaxınlarınızla ünsiyyət daxili tarazlığı bərpa etməyə kömək edəcək. Bundan əlavə, psixoloq düzgün istirahət və nizamlı yuxunu da unutmamağa çağırıb. Meditasiya və ya sadə nəfəs məşqləri üçün gündə cəmi 10-15 dəqiqə ayıra bilərsiniz.

Bundan əlavə, psixoloq vurğulayıb ki, “yox” deməyi öyrənmək, vaxt və resursları qorumaq vacibdir. Dostlardan, qohumlardan və ya mütəxəssislərdən kömək istəməkdən çəkinmək olmaz.

Dietoloq Marina Makişanın fikrincə isə küncüt streslə mübarizə aparmağa kömək edir. Tərkibində yüksək miqdarda maqnezium var, o narahatlıq və sinir gərginliyini aradan qaldırır. Digər psixoloq Dmitri Stepanov saqqız çeynəməyin stresin öhdəsindən gəlməyə kömək etdiyini söyləyib. O izah edib ki, stres zamanı üz əzələləri gərginləşir və beyin yalnız mənfi emosiyalara diqqət yetirir. Saqqız çeynəmək əzələlərin rahatlamasına kömək edən trigeminal siniri aktivləşdirir.

Bundan əlavə, Toronto Universitetinin alimləri müəyyən ediblər ki, güclü stres yaddaş pozğunluqları yaradır və insanın təhlükəsiz vəziyyətləri təhlükəli vəziyyətlərlə qarışdırmasına səbəb olur.