Şuşada möhtəşəm Novruz şənlikləri | "Güllü bağ"da bayram yarmarkası təşkil edildi - Baku TV

Azərbaycan xalqının tarixində, mədəniyyətində, adət-ənənələrində özünəməxsus yeri olan Novruz bayramı martın 19-da Şuşa şəhərində yüksək təntənə ilə qeyd edilib.

“Şuşa baharı” adlı bayram tədbiri Şuşa rayonunda Prezidentin xüsusi nümayəndəliyinin və Şuşa Şəhəri Dövlət Qoruğu İdarəsinin təşkilatçılığı ilə təşkil edilib.

Bayram tədbirində Şuşa rayonunda Azərbaycan Prezidentinin xüsusi nümayəndəsi Aydın Kərimov, Şuşa Şəhəri Dövlət Qoruğu İdarəsinin icraçı direktoru Tural Novruzov, Xüsusi Nümayəndəliyin və Qoruq İdarəsinin əməkdaşları, rayonun hüquq-mühafizə orqanlarının, idarə və müəssisələrinin rəhbərləri, Şuşa sakinləri, ictimaiyyət nümayəndələri və şəhərə təşrif buyuran qonaqlar iştirak ediblər.

Şuşa şəhər 1 nömrəli tam orta məktəbində təşkil edilən tədbirdə şagirdlərin hazırladıqları maraqlı kompozisiyalar, şeirlər, musiqi və rəqs nömrələri alqışlarla qarşılanıb.

“Güllü bağ” bayram yarmarkasında Şuşa sakinləri tərəfindən dadlı və ləzzətli təamlar, Novruz şirniyyatları, əl işləri təqdim edilib.

“Şuşa baharı” adlı konsert proqramında istedadlı Şuşa sakinlərinin, məktəblilərin ifasında mahnı və rəqslər hər kəsin marağına səbəb olub.

Respublikanın Xalq artisti Nazpəri Dostəliyeva və müğənnilər – Azad Şabanov və Namiq Qasımovun ifaları böyük rəğbətlə qarşılanıb.