Uşaq evindən milli yığmaya: 9 yaşında ailəsi onu atdı, indi isə milli yığmamızın futbolçusudur

“Arzunun vaxtı” verilişinin budəfəki qonağı futbolçu Fidan Cəfərova olub.

Fidan Cəfərova uşaqlıq illərindən, iki bacısı ilə birlikdə uşaq evinə yerləşdirilməsindən və valideynləri ilə bağlı yaşadığı ağır hadisələrdən danışıb.

O bildirib ki, 9 yaşında olarkən iki bacısı ilə birlikdə valideynləri tərəfindən uşaq evinə yerləşdirilib:

“Bizə dedilər ki, sizi parka aparırıq. Uşaq evinə gedəcəyimizi bilmirdik. Getdik, gördük ki, böyük bir binadır. Oraya daxil olduq və bizi qoyan kimi getdilər”.

Fidan Cəfərova uşaq evində keçirdiyi ilk illərin onun üçün çox ağır olduğunu qeyd edib:

“İki il mən onlarla heç danışmadım. Elə bil hər şey mənim üçün sönmüşdü, həyatım durmuşdu. Amma bir az sonra öyrəşdim”.

Futbola da məhz uşaq evində yönləndirildiyini deyən Fidan Cəfərova əvvəlcə bu idman növünü sevmədiyini, məşqlərə ağlaya-ağlaya getdiyini bildirib.

Futbolda ilk uğurlarından danışan futbolçu milli komandaya dəvət aldıqdan sonra bu sahəyə münasibətinin dəyişdiyini qeyd edib:

“Milli komandaya dəvət aldıqca işimin fərqinə varmağa başladım və dedim ki, bu iş mənim üçün artıq bir peşədir”.