Tələbələr bufet qiymətlərindən şikayətləndi, satıcılar isə... - Baku TV

Tələbələr universitet bufetində satılan qidaların qiymətlərinin büdcələrinə uyğun olmadığından şikayət edirlər.

Onlar həmçinin bufetdə təqdim olunan yeməklərin tərkibinin də həmin qiymətlərə adekvat olmadığını bildirirlər.

Tələbələrin sözlərinə görə, oxşar menyular universitetdən kənardakı iaşə obyektlərində daha münasib qiymətə təklif olunur.

“Keçən dəfə şaurma aldım, içində ət yox idi. Ancaq kahı var idi. Məni aldadıblar. Üç manata kahı alıb yedim”, – tələbələrdən biri deyib.

“Bufetdə qiymətlər baha olur. Büdcəmə uyğun olmadığı üçün almıram”, – başqa bir tələbə bildirib.

İqtisadçı Xalid Kərimli deyir ki, qiymətlərə təsir edən əsas amil obyektlərin icarə şərtləridir. Onun sözlərinə görə, qiymət siyasətinin əvvəlcədən daha dəqiq razılaşdırılması tələbələr üçün daha uyğun şərait yarada bilər:

“Universitetlərdə bufetlər adətən sahibkarlara icarəyə verilir. Sahibkar isə icarə haqqını ödədikdən sonra işini təşkil etməkdə sərbəstdir. Hesab edirəm ki, universitetlər qiymət siyasətində şərtləri əvvəlcədən razılaşdırmalıdır. Bazar qiymətlərindən daha əlverişli tariflərin təklif edilməsi məsələsi diqqətdə saxlanmalıdır”.