Türkan qəsəbəsində avtobus problemi: sakinlər yolda qalıblar

Bakının Türkan qəsəbəsinin sakinləri marşrut avtobuslarının intervalından narazıdırlar.

Sakinlərin sözlərinə görə, qəsəbənin avtobus problemi illərdir həll olunmur. Avtobusların sayının azlığı və yarımsaatlıq intervalla hərəkət etməsi gediş-gəlişi çətinləşdirir.

101 nömrəli avtobusun sürücüləri isə deyir ki, daha tez intervalla hərəkət etmək onlara sərf etmir. Çünki günorta saatlarında Türkan qəsəbəsindən şəhər mərkəzi istiqamətinə birbaşa gedişlər azdır.

Azərbaycan Yerüstü Nəqliyyat Agentliyindən bildirildi ki, təhlillər nəticəsində 101, 150 və 187 nömrəli marşrutların sxemində dəyişiklik olunub. Hər 3 marşrutun işinin optimallaşdırılmasına, xüsusən də günün pik saatında şəhər mərkəzi istiqamətində nəqliyyat sıxlığının azaldılmasına müəyyən dərəcədə nail olunub.

Agentlikdən o da bildirildi ki, bu barədə daşıyıcılara xəbərdarlıq olunub. Həmçinin marşrut üzrə daşımalara əlavə avtobusların cəlb edilməsinin zəruriliyi bildirilib.