Üç ayda 9 medal qazanan şagirdin uğur hekayəsi - Baku TV

10 yaşlı qızcığaz həmyaşıdlarına örnək ola biləcək uğura imza atıb.

O, kiçik yaşlarından çətinliklə üzləşsə də, böyük əzmi və zəhməti sayəsində qəhrəmana çevrilib.

Söhbət Biləsuvar şəhər 4 nömrəli tam orta məktəbin şagirdi Ümmügülsüm Ruhullayevadan gedir.

O, üç ay ərzində müxtəlif olimpiada və intellektual yarışlarda iştirak edərək 9 medal qazanıb. Ümmügülsüm beynəlxalq “MathXcel” riyaziyyat olimpiadasında qızıl medal qazanaraq ABŞ-nin Los-Anceles şəhərində keçiriləcək final mərhələsinə vəsiqə əldə edib.

“Birinci sinifdə anam mənə həmişə riyaziyyat kitabları alırdı. Riyaziyyat kitablarını işlədikcə bu sahəyə marağım daha da artdı. Bu il mən doqquz olimpiadada iştirak etdim. Onlardan beşindən qızıl, ikisindən gümüş, ikisindən isə bürünc medal qazandım. Ən çətini Kopernik Riyaziyyat Olimpiadası olmuşdu, amma mən qəhrəmancasına öhdəsindən gələrək medal qazana bildim. Mənim məqsədim həkim olmaqdır. Qarşıma məqsəd qoymuşam ki, Amerikaya gedim və oradan qızıl medal qazanım”, – Ümmügülsüm Ruhullayeva deyib.