Uşaqlar görün necə təhlükəli parkda oynayır | “İcradan deyirlər ki, özünüz edin!”

Suraxanı rayonu, Bülbülə qəsəbəsində yerləşən parkın baxımsız vəziyyətdə olması yerli sakinlərin narazılığına səbəb olub.

Belə ki, parkdakı oturacaqlar, yelləncəklər və futbol meydançası yararsız vəziyyətdədir, ərazi isə məişət tullantıları ilə doludur.

Sakinlərin sözlərinə görə, bu parkda bir neçə il əvvəl ölüm hadisəsi də baş verib. Futbol meydançasında yerləşən qapı dirəklərindən biri vətəndaşın üzərinə aşıb və həmin şəxs hadisə yerində həyatını itirib.

“Burada tez-tez uşaqlar futbol oynayırlar. Həyatını itirən şəxs də topu götürmək istəyəndə dirək üstünə aşmışdı. İcra Hakimiyyətindən isə deyirlər ki, park bizə məxsus deyil, özünüz edin”, ‒ sakinlərdən biri söyləyib.

Məsələ ilə bağlı Suraxanı Rayon İcra Hakimiyyətindən verilən məlumata görə, qəsəbənin Aşurbəyov küçəsində yerləşən parkda zibillərin vaxtında təmizlənməməsi ilə bağlı Mənzil-Kommunal Təsərrüfat Birliyinə müraciət olunub. Qurum bildirir ki, parkda təmir işlərinin gələcəkdə həyata keçirilməsi nəzərdə tutulur.