Bakıda həbsxana yaxınlığında dəhşətli cinayət | Qatillərin cəzası sərtləşdirildi

2016-cı il dekabrın 23-də Suraxanı Rayon Polis İdarəsinin 31-ci Polis Bölməsinin əməkdaşları tərəfindən Bülbülə qəsəbəsində yerləşən 16 saylı cəzaçəkmə müəssisəsinin yaxınlığında qətlə yetirilən şəxsin meyiti tapılıb.

Araşdırmalar nəticəsində öldürülən şəxsin Tovuz rayonunda anadan olan və Ramana qəsəbəsində kirayə yaşayan 1988-ci il təvəllüdlü Elşən Əmirov olduğu müəyyən edilib. Məhkəmə-tibbi ekspertizasının rəyinə görə, Elşən Əmirovun ölümünə sol ağciyərin və ürəyin zədələnməsindən törənən kəskin qanitirmə səbəb olub.

Hadisə ilə bağlı Suraxanı Rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi açılıb. Hadisəni törədən Elnur Məmmədov və Elçin Həsənov həbs edilib.

Məhkəmə iclasında Elnur Məmmədov ittiham üzrə özünü qismən təqsirli bilib. Elçin Həsənov özünü təqsirli bilməyib və barəsində bəraət hökmü çıxarılmasını istəyib. Zərərçəkən şəxsin hüquqi varisi təqsirləndirilən şəxslərə ağır cəza təyin olunmasını xahiş edib.

Bakı Ağır Cinayətlər Məhkəməsinin hökmü ilə Elnur Məmmədov 17 il, Elçin Həsənov 4 il müddətinə azadlıqdan məhrum olunub. Prokurorluq Elçin Həsənova yüngül cəza verildiyini bildirib və apellyasiya protesti verib.

Bakı Apellyasiya Məhkəməsinin qərarı ilə Prokurorluğun protesti və zərərçəkən şəxsin hüquqi varisinin şikayəti təmin edilib. Elnur Məmmədovun cəzası 17 ildən 18 ilə, Elçin Həsənovun cəzası isə 4 ildən 16 ilədək artırılıb.