Xaçmazda yüksək bal toplayan məzunlar mükafatlandırılıb

Xaçmazda ali məktəblərə yüksək balla qəbul olmuş məzunlarla görüş keçirilib.

Rayon İcra Hakimiyyətinin başçısı Elnur Rzayev tələbə adını qazanan məzunları təbrik edib, gələcək həyatlarında uğurlar arzulayıb. Məzunlara milli-mənəvi dəyərlərə sadiq, vətənpərvər, savadlı gənclər olaraq ölkəmizin sosial-iqtisadi və mədəni həyatında aktiv iştirak etmələrini arzulayıb.

Görüşdə məlumat verilib ki, Xaçmaz rayonu üzrə bu il məktəbi bitirən məzunlardan 530 nəfəri tələbə adını qazanıb. Qəbul olunanlardan 51 nəfər 500-dən, 5 nəfər isə 600-dən çox bal toplayıb.

Müəllimlər və məzunlar təhsilimizə göstərilən diqqət və qayğıya görə Azərbaycan Respublikasının Prezidenti İlham Əliyev və Birinci vitse-prezident Mehriban Əliyevaya minnətdarlıqlarını ifadə ediblər.

Sonda qəbul imtahanlarında yüksək nəticə göstərən məzunlar Elnur Rzayev tərəfindən fəxri fərman və hədiyyələrlə mükafatlandırılıb.