Yeni Ramana sakinlərinin həll olunmayan problemi

Yeni Ramana qəsəbəsində avtobus problemi yaşanır.

Sakinlərin sözlərinə görə, sözügedən əraziyə yalnız 214 nömrəli avtobus işləyir. Həmin avtobus isə axşam səkkizə kimi fəaliyyət göstərir:

“Axşam səkkizdən sonra məcbur qalıb evə taksi ilə gedirik. Sakinlər əziyyət çəkirlər. Uşaqlar yağışlı havada çox çətinliklə gedib-gəlirlər. Marşrutun hərəkət xətləri uzadılmalıdır, həmçinin qəsəbə yeni avtobuslarla təmin olunmalıdır”.

Məsələ ilə bağlı Yerüstü Nəqliyyat Agentliyindən bildirilib ki, aparılan araşdırma nəticəsində marşrutun təyin olunmuş iş saatından tez dayandırılması halları müəyyən edilib:

“Bununla bağlı daşıyıcıya xəbərdarlıq olunub. Marşrut üzrə avtobus sayının sərnişin tələbatına uyğun istismar olunmayacağı və xəttin nizamlı təmin edilməyəcəyi təqdirdə marşrutun müsabiqəyə çıxarılması nəzərdə tutulub”.