Yuxu müddətinin az olması orqanizmə necə təsir edir? - Alimlərdən xəbərdarlıq

Vençjou Tibb Universitetinin (Çin) alimləri müəyyən ediblər ki, sabit yuxu rejimi və səkkiz saatlıq gecə yuxusu uğurlu yaşlanma üçün ən əlverişlidir.

Məlumata görə, tədqiqatda orta yaşı 60 olan 3306 könüllü iştirak edib. İştirakçıların ümumi yuxu müddəti 2011, 2013 və 2015-ci illərdə könüllülərin özləri tərəfindən təqdim edilən məlumatlardan istifadə edilərək gecə və gündüz yuxusunun cəmlənməsi ilə hesablanıb.

Alimlər sağlam yaşlanmanı beş meyar üzrə qiymətləndiriblər: xroniki xəstəliklərin olmaması, gündəlik fəaliyyətləri müstəqil yerinə yetirmək qabiliyyəti, koqnitiv rifah, minimal depressiya əlamətləri və sosial fəallıq.

Doqquz illik müşahidə müddətində uğurlu yaşlanma meyarlarına iştirakçıların yalnız 13,8%-i cavab verib. Müəyyən edilib ki, yeddi saatdan az yuxu rifah şanslarını azaldır.

Yuxu müddətində yüksək dəyişkənliyi olan iştirakçılarda da sağlam yaşlanma ehtimalı daha aşağı olub. Bu müşahidələr müxtəlif çəkili, siqaret çəkən və alkoqol qəbul edən, həmçinin müxtəlif yaşlı kişi və qadınlar da daxil olmaqla bütün alt qruplar üçün eyni olub.