100-dən çox sərnişində virus aşkarlandı

“MV Hondias” laynerinin ardınca daha bir kruiz gəmisində kütləvi infeksiya yoluxması qeydə alınıb.

Belə ki, “Karib şahzadəsi” adlı kruiz gəmisində 100-dən çox insan norovirusa yoluxub. Bu barədə ABŞ-nin Xəstəliklərə Nəzarət və Profilaktika Mərkəzi məlumat yayıb.

Qurumdan bildirilib ki, 102 sərnişin və 13 heyət üzvü daxil olmaqla ümumilikdə 115 nəfər virusa yoluxub. Laynerin göyərtəsində ümumilikdə 3 mindən çox sərnişin və 1131 əməkdaş var.

Bildirilib ki, xəstələr əsasən qusma və güclü ishaldan şikayət ediblər. Yoluxan şəxslər təcrid olunub, onlardan tədqiqat aparılması üçün bioloji nümunələr götürülüb.

Layner aprelin 28-də Floridadan yola düşüb və mayın 11-də Kanaveral limanına çatmalıdır. Kruiz zamanı gəmi Dominikan Respublikasında və Baham adalarında dayanacaq edir. Limana qayıtdıqdan sonra layner növbəti reysdən əvvəl tam sanitar dezinfeksiyadan keçiriləcək.