14 milyard dollarlıq dələduzluq | Tokayev Rusiyanı nədə ittiham etdi?

Prezident Kasım-Jomart Tokayev Qazaxıstan bankları vasitəsilə təxminən 14 milyard dolların mənimsənildiyini açıqlayıb.

O bu açıqlamanı maliyyə cinayətləri ilə mübarizə mövzusunda keçirilən iclasda verib.

Tokayevin sözlərinə görə, banklar "qonşu ölkə"nin iştirakı ilə 7 trilyon tengedən (təxminən 14 milyard dollar) çox dələduzluq hallarına yol veriblər.

"Mənim fikrimcə, bu, hüquqi, iqtisadi və hətta siyasi baxımdan utancverici bir faktdır. Təəssüf ki, bu cür saxta maliyyə sxemləri halları çoxsaylıdır və hələ də qalmaqdadır", – deyə Prezident vurğulayıb.

Qeyd edək ki, Qazaxıstan Rusiya vətəndaşlarının ölkədə bank əməliyyatlarına nəzarəti gücləndirib. Qazaxıstanın Maliyyə Bazarının Tənzimlənməsi və İnkişafı Agentliyi əvvəllər 2024-cü ildə cinayət yolu ilə əldə edilən gəlirlərin yuyulmasında istifadə edilən kart sahiblərinin 90%-dən çoxunun qeyri-rezident olduğunu bildirmişdi. İl ərzində ümumi məbləği 24 milyard tenge (47 milyon ABŞ dolları) olan 6200 sözdə "kart itkisi" hadisəsi qeydə alınıb.

Rusiya vətəndaşları tərəfindən Qazaxıstan bank kartlarının kütləvi şəkildə uzaqdan istifadəsi Rusiyaya qarşı sanksiyaların tətbiqindən sonra başlayıb. Qazaxıstan hakimiyyəti bu sxemləri tədricən bağlayır. 2024-cü ildən etibarən fərdi identifikasiya nömrələrinin uzaqdan verilməsi qadağan edilib. Qeyri-rezidentlər üçün bank xidmətləri əhəmiyyətli dərəcədə sərtləşdirilib. 2025-ci ildə tənzimləyici yaşayış icazəsi olmayan bütün əcnəbilərin hesablarına daxil olmaq üçün aylıq identifikasiyadan keçmələri tələb olunur.