30-dan çox ölkə Ukraynaya qoşun göndərməkdən imtina etdi

Yalnız güc və birlik Rusiya Federasiyasını müharibəni dayandırmağa məcbur edəcək, istənilən güzəşt növbəti təcavüzə səbəb olacaq.

Bunu Ukraynanın xarici işlər naziri Andrey Sibiqa deyib.

Onun sözlərinə görə, Ukrayna ABŞ və Avropadan olan tərəfdaşlarla birlikdə BMT Nizamnaməsi və beynəlxalq hüquq əsasında ədalətli və davamlı sülhün təmin edilməsinə sadiqdir.

Bu arada “Könüllülər koalisiyası”na daxil olan ölkələr Ukraynanın hərbi-sənaye kompleksinə dəstək verməyə üstünlük verərək öz qoşunlarını bu ölkəyə göndərməyi planlaşdırmır.

Bu barədə “The Sunday Times” nəşri Böyük Britaniya Müdafiə Nazirliyindəki mənbəyə istinadən yazır.

Əsas diqqət Ukrayna Silahlı Qüvvələrinin döyüş hazırlığının təmin edilməsinə yönəlib.

Mənbə qeyd edib ki, heç kim öz əsgərlərinin həyatını riskə atmaq istəmir, ona görə də Ukrayna Ordusunu gücləndirmək vacibdir. Bura təkcə Hava Hücumundan Müdafiə sistemləri və dronların tədarükü deyil, həm də uzaqmənzilli raketlərin istehsalı daxildir ki, Kiyev digər ölkələrdən asılı olmadan onlardan müstəqil şəkildə istifadə edə bilsin.

Qeyd edək ki, “Könüllülər koalisiyası” Ukraynada sülhməramlı missiyada iştirakı mümkün hesab edən 30-dan çox ölkənin birliyidir.