30 yaşdan yuxarı olanlar bu müəssisələrdə peyda olur | Ukraynada nə baş verir?

Son vaxtlar Ukraynada səfərbərlik ilə bağlı yaranan narahatlıqlar fonunda universitetlərdə tələbələrin qəfil yoxlanışına başlanılıb.

Yayılan xəbərlərdə bu onunla əsaslandırılıb ki, yaşı 30-dan çox olan şəxslər ordudan yayınmaq üçün universitetlərdə tələbə adı altında gizləniblər.

Təhsilin Keyfiyyəti üzrə Dövlət Xidmətinin İdarə rəisi Nataliya Vitranyuk bildirib ki, müharibə başlayandan sonra çoxlu sayda hərbi yaşda olan kişilərin ali məktəblərdə peyda olduqlarını seziblər və buna görə də yoxlamalara başlayıblar:

“Bizim yoxlamalarımızdan sonra təhsil müəssisələri müqavilə şərtlərini pozduqlarına, tədris planına əməl etmədiklərinə görə 20 mindən çox çağırış yaşlı, əsasən 30 yaşdan yuxarı olan şəxsləri universitetlərdən xaric etdilər. Bəziləri isə könüllü olaraq xaric olunublar”.

N.Vitranyuk qeyd edib ki, 2024-cü ilin yazında qanunvericiliyə edilən dəyişikliklərə əsasən, artıq çağırış yaşında olanlar üçün daha bir ali təhsil alaraq ordudan möhlət almaq prosesi mümkün deyil:

“Yalnız təhsil ardıcıl və ilk dəfə alındıqda bunu etmək hüququ var. Gördüyümüz tədbirlərdən əvvəl təhsilin ardıcıllığı izlənilmirdi. Yəni bir dəfə bakalavr və magistr dərəcəsi alan yenidən gedib ali təhsil ala bilirdi. Bu da indiki hərbi rejimdə bəzilərinin ordudan yayınmasına şərait yaradırdı”.