444 milyon illik sirr | Yerlə bağlı daha bir müəmma ortaya çıxdı

Cənubi Afrikanın Keyptaun şəhərinin şimalındakı Soom Şeyli bölgəsində 444 milyon il əvvələ aid yeni bir ibtidai buğumayaqlının fosili aşkar edilib.

Lester Universitetinin professoru Sara Qabbott bu yeni fosilin nə qədər qeyri-adi olduğunu və onun təkamül əlaqələrinin hələ də qeyri-müəyyən qaldığını açıqlayıb. Tapıntıya “Sue” adı verilib.

Təxminən 440 milyon il əvvəl Yer kürəsində növlərin 85 faizini məhv edən buz dövrü baş verib.

Mütəxəssislərə görə, “Sue”nun qorunduğu dəniz hövzəsi həmin dövrdə soyuqdan qaçan növlər üçün sığınacaq rolunu oynamış ola bilər. Hərçənd ki, bu bölgədə həyatın davam etməsinə şərait yaransa da, onun ideal olduğunu söyləmək olmaz.

Fosilin İngiltərəyə daşınmasından sonra araşdırmalar davam etdirilir. Bu tədqiqat 400 milyon il əvvəlki Yer kürəsi ilə bağlı bir çox bilinməyən sirrin açılması üçün mühüm hesab edilir.