ABŞ-dən “Hücumu dayandırırıq” deyən “Kətaib-Hizbullah”a reaksiya

İranyönümlü “Kətaib Hizbullah” təşkilatının Amerika Birləşmiş Ştatlarının Ordusuna qarşı bütün hərbi əməliyyatların dayandırıldığına dair verdiyi açıqlamasına rəsmi Vaşinqton münasibət bildirib.

Ağ Evin Milli Təhlükəsizlik Şurasının strateji kommunikasiyalar üzrə koordinatoru Con Kirbi deyib ki, ölkəsinə hücum edən yeganə qüvvə sözügedən təşkilat deyil:

“Mən məsələ ilə bağlı bir-iki məqamı diqqətə çatdırmaq istəyirəm. Birincisi, “Kətaib Hizbullah” kimi bir qruplaşmanın dediklərini heç cür ciddiyə ala bilmərik. İkincisi, bizə regionda hücum edən yeganə qrup onlar deyil.

Qeyd edim ki, İraqdakı “İslam Müqaviməti” təşkilatına digər qruplaşmalar da daxildir. Buradan da belə nəticəyə gəlmək olar ki, xalqımıza qarşı törədilən zorakılığın yeganə sahibləri onlar deyil. Üçüncüsü, qayıdıram bizim həlak olan əsgərlərimizə. Burada 3 ailə var, hansı ki, öz faciələrini yaşayırlar. Bir həqiqət də var ki, əsgərlərimizi onlar öldürüblər”.

Ağ Evin rəsmisi çıxışında onu da deyib ki, Amerika Birləşmiş Ştatlarının İordaniyadakı hərbi bazasına edilən və 3 amerikalı əsgərin ölümü ilə nəticələnən hücum “Kətaib Hizbullah” da daxil olmaqla “İslami Müqavimət” qruplaşmasının dəstəyi ilə həyata keçirilib.