ABŞ-dən İrana cavab gəldi, amma... | Trampın adamının bu hərəkəti şok yaşatdı

ABŞ Prezidenti Donald Trampın Yaxın Şərq üzrə xüsusi nümayəndəsi Stiven Uitkofun İran xarici işlər naziri Abbas Əraqçinin “X” sosial şəbəkəsindəki paylaşımına verdiyi reaksiyalar müzakirələrə səbəb olub.

İranlı nazir sosial şəbəkədə Tehran və Vaşinqton arasındakı məsəsələlərin diplomatik yolla həll edilə biləcəyini bildirib.

Abbas Əraqçi öz paylaşımında yazıb: “Diplomatik təmaslar keçmişdə effektivliyini sübut edib, hələ də təsirli ola bilər”.

Diplomatik prosesin davam etdirilməsinin mümkünlüyünü vurğulayan bu mesaj Trampın xüsusi elçisindən gözlənilməz cavab alıb. Bu tvitə Uitkoff “möhtəşəm” cavabını verib. Amma Uitkofun şərhini bir neçə saat sonra silməsi də diqqət çəkib.

“Al Arabiya” yazır ki, bu qəfil dəyişiklik bir çox suallar doğurur:

“Əgər Uitkofun cavabı diplomatik variantın təsdiqi idisə, onun sonradan silinməsi nə deməkdir? O, cavabını Vaşinqtonda daxili təzyiqə məruz qaldıqdan sonra silib?

Tramp administrasiyası dəfələrlə İranla diplomatik təmas və hərbi təzyiq arasında tərəddüd edib. Bir tərəfdən də ABŞ Prezidenti İranın ali dini lideri Əli Xameneyiyə yazdığı son məktubunda danışıqların mümkünlüyünü bildirmişdi. Həmçinin o, Tehranın tələblərini yerinə yetirməsə, hərbi variantın masada olacağı ilə bağlı dəfələrlə hədələyib. Bu kontekstdə Uitkofun Əraqçiyə cavabı diplomatiyanın effektivliyini təsdiqləsə də, amma onun silinməsi daha sərt mövqeyə keçiddən xəbər verə bilər. Bu, Trampın İrana qarşı siyasətinin gələcəyi ilə bağlı çoxsaylə suallar doğurur”.