ABŞ hakimiyyəti məmurlara məktub göndərdi | Yüz minlərlə insan bu təklifi qəbul edəcək

ABŞ hakimiyyəti federal hökumət məmurlarına öz istəkləri ilə işdən çıxmaq üçün ərizə verəcəkləri halda təzminat olaraq səkkiz aylıq maaş ödəməyi təklif edib.

TASS xəbər verir ki, bu barədə “Axios” portalı öz mənbələrinə istinadən məlumat yayıb. Yüz minlərlə insanın bu təklifi qəbul edəcəyi gözlənilir.

Məlumata görə, bu təklifin əks olunduğu məktub əvvəllər məsafədən iş rejimindən ofisə qayıtmaq göstərişi verilən məmurlara göndərilib. Əgər onlar fevralın 6-dək öz istəkləri ilə işdən çıxmaq barədə ərizə versələr, sentyabrın 30-na qədər nəzərdə tutulan bütün ödənişləri ala biləcəklər.

“COVID-dən beş il keçib və federal məmurların yalnız 6 faizi ofisdə tam iş günü işləyir. Bu, qəbuledilməzdir”, – ABŞ Administrasiyasının yüksəkvəzifəli məmuru “Axios”a bu təşəbbüsü şərh edib.

“Ağ Ev federal məmurların 5-10 faizinin təklifi qəbul edəcəyini gözləyir ki, bu da potensial olaraq yüz minlərlə insanın işdən çıxa biləcəyi deməkdir”, – portal vurğulayır.

Federal hökumətin hesablamalarına görə, göstərilən sxem vergi ödəyicilərinə ildə 100 milyard dollara qədər vəsaitə qənaət etməyə imkan verəcək.

“Axios”un məlumatına görə, təklif poçt işçiləri, immiqrasiya nəzarəti xidmətlərinin və xüsusi xidmət orqanlarının əməkdaşları, həmçinin hərbçilər istisna olmaqla bütün federal məmurlara şamil edilir.