ABŞ-İran qarşıdurmasında hərbi obyektlər yenidən hədəfdə - Baku TV

İranın İslam İnqilabı Keşikçiləri Korpusu ABŞ-nin İordaniyadakı qırıcılarının təmir-texniki xidmət, hazırlıq və dislokasiya anqarını, həmçinin ABŞ Hərbi Dəniz Qüvvələrinin qanadlı raketlər və "Aegis" döyüş sistemi daşıyan döyüş esmineslərini hücuma məruz qoyub.

"Tasnim" xəbər verir ki, Amerikanın İordaniyadakı Əl-Əzrəq bazasına ağır raket zərbələri endirilib.

"Təcavüzkarı cəzalandırmaq məqsədilə keçirilən bu əməliyyatda ballistik raketlərin ağır hücumu ilə qırıcılarının təmir-texniki xidmət, hazırlıq və dislokasiya anqarı, qanadlı raketlər və "Aegis" döyüş sistemi daşıyan döyüş esminesləri vurulub və inadkar düşmənə ağır ziyan dəyib", – deyə İslam İnqilabı Keşikçiləri Korpusunun bəyanatında bildirilib və əlavə edilib ki, ABŞ-nin heç bir hücumu cavabsız qalmayacaq.

Bu arada, İordaniyanın hava hücumundan müdafiə qüvvələri İran ərazisindən krallıq istiqamətində buraxılmış 20 ballistik raketdən 18-ni məhv edib. Hərbçilərin məlumatına görə, yerdə qalan iki raket əhalinin yaşamadığı ərazilərə düşüb, hücumlar nəticəsində ölən olmayıb.