ABŞ-nin Ukraynaya imtina etmə səbəbi açıqlandı | Rusiya ordusu artıq döyüş təyyarələrini…

“ABŞ Ukraynaya Amerikanın uzaqmənzilli raketləri ilə Rusiya ərazisinin dərinliklərinə zərbə endirməyə icazə vermir”.

Bu sözlər ABŞ-nin müdafiə naziri Lloyd Ostinin dilindən “Fox News”a müsahibəsində səslənib.

Onun sözlərinə görə, Rusiya Ordusu artıq döyüş təyyarələrini cəbhə xəttindən 300 kilometrdən çox məsafəyə yerləşdirib. Yəni həmin təyyarələr ATACMS raketlərinin əhatə dairəsindən kənarda yerləşir.

Digər səbəb isə Ukraynanın ABŞ raketləri olmadan da Rusiya xətlərinin arxasındakı hədəfləri vurmaq qabiliyyətinə malik olmasıdır.

Lloyd Ostin sərhəddən 400 km və hətta daha uzaq məsafədə yerləşən hədəflərə hücum edə bilən Ukrayna pilotsuz təyyarələrini xatırladıb.

Bununla birlikdə, L.Ostin Rusiya hakimiyyətinin təhdidlərini imtinanın səbəbləri arasında qeyd etməyib. Lloyd Ostin Ukraynanın mümkün qələbəsi haqqında bu sözlərdən istifadə edib:

“Ukraynanın öz ərazisini qoruya bilən və gələcək təcavüzün qarşısını ala bilən suveren dövlət kimi qorunub saxlanılması”.

“Bu sözlər Ukraynanın beynəlxalq səviyyədə tanınan bütün ərazisi üzərində nəzarətinin bərpasını nəzərdə tuturmu?” sualına L.Ostin dəqiq cavab verməyib.