ABŞ və İsrailin 30-a yaxın hədəfi vuruldu | Müharibədə son durum - Baku TV

“İran İslam İnqilabı Keşikçiləri Korpusu altıncı hücum dalğası ilə ABŞ və İsrailin bölgədəki onlarla hədəfinə hücum edib”.

Bu barədə SEPAH-ın İctimaiyyətlə Əlaqələr İdarəsinin məlumatında bildirilib.

Qeyd olunub ki, əməliyyat zamanı raketlər və dronlardan istifadə edilib.

“Hücuma məruz qalan hədəflər arasında ABŞ-nin bölgədəki 27 bazası, eləcə də İsrail Ordusunun ümumi komandanlığının qərargahı olan “Tel Nof” bazası və Tel-Əvivdəki böyük müdafiə sənayesi kompleksi olub”, – deyə açıqlamada vurğulanıb.

Bu arada İranın İslam İnqilabı Keşikçiləri Korpusunun baş komandanı general-mayor Məhəmməd Pakpur ABŞ və İsrail zərbələri nəticəsində həlak olub. Onun yerinə briqada generalı Əhməd Vahidi təyin edilib. ABŞ-nin Yaxın Şərqdəki bir neçə müttəfiqi İrana qarşı hazırlanan zərbələr barədə hərbi kanallar vasitəsilə xəbərdarlıq alıb.

Bu barədə CNN mənbələrə istinadən məlumat yayıb.

Vurğulanıb ki, bəzi ölkələrə ABŞ Prezidenti Donald Tramp Administrasiyasının yüksəkrütbəli nümayəndələri şəxsən zəng ediblər.

Əvvəllər bir sıra regional dövlətlər Tramp Administrasiyasını zərbələr endirməkdən çəkindirmək üçün aktiv səylər göstərsə də, bəzi ölkələr, o cümlədən Səudiyyə Ərəbistanı və BƏƏ, əksinə, əməliyyatın keçirilməsinin tərəfdarı kimi çıxış edib.