Adamyeyənlik burada yaranıb? - Tükürpərdən tapıntılar ortaya çıxdı

Alimlər təxminən 18 min il əvvəl indiki Polşa ərazisində yaşamış madlenlərin adamyeyənliyinə dair sübutlar aşkar edib.

İspaniya, Almaniya və Polşadan olan alimlər qrupunun araşdırmasında bildirilir ki, Polşada yaşayan madlenlər son paleolit mədəniyyətinin nümayəndələridir. Bu ad onlara dair ilk artefaktların tapıldığı Fransadakı La-Madlen mağarasından götürülüb.

Madlen mədəniyyəti təxminən 12 min il əvvəl Buz Dövrünün bitməsi ilə məhv olub. XIX əsrdə və 1960-cı illərdə tapılan sümüklər parçalanmış vəziyyətdə olduqlarından onların uzun müddət heyvanlara aid olduğu bildirilirdi. Lakin ciddi araşdırmalardan sonra tədqiqatçılar onların kəsilib yeyilməsi ilə bağlı xarakterik izlər aşkar etdilər. Sümüklərin çoxu iliyi çıxarmaq üçün deşilib, bu da onların qida mənbəyi kimi istifadə edildiyini göstərir.

Bundan əlavə, insan sümükləri kəsilib yeyilmiş heyvan qalıqlarının yanından tapılıb. Bütün sümüklərin eyni dövrə aid olması, onların eyni vaxtda, birlikdə basdırıldığını göstərir.

Alimlər hesab edirlər ki, madlenlərin adam yeməyinə səbəb ağır həyat şəraiti ola bilərdi. Bununla belə, onlar kannibalizmin ritual təcrübələrinin bir hissəsi ola biləcəyini də istisna etmirlər.