Etnanın güclü püskürməsi turistləri cəlb edib

Turistlər Avropanın ən aktiv vulkanlarından biri olan Etna vulkanının püskürməsini izləmək üçün Siciliyada dağın yamaclarına toplaşıblar.

Qızmar lava dağın şərq yamacı boyunca axmaqda davam edir. Tüstü ilə əhatə olunmuş ərimiş süxur axınları aşağıya doğru hərəkəti edir. Turistlər isə təhlükəsiz məsafədə dayanaraq baş verənləri kameraya çəkirlər.

İtaliyanın Milli Geofizika və Vulkanologiya İnstitutunun məlumatına görə, avqustun 11-də lava 2750, 2090 və 1900 metr yüksəklikdə yerləşən kraterlərdən çıxmağa davam edib. Püskürmənin son mərhələsində lava kütlələri dağın daha aşağı hissələrinə doğru hərəkət edib. Etna ərazisində sarı təhlükə səviyyəsi qüvvədə qalır.

Yerli hakimiyyət orqanları turistləri təhlükəsizlik tədbirlərinə riayət etməyə çağırır. Vulkanın hazırkı aktivlik mərhələsi ötən il dekabrın 24-də başlayıb. Bununla yanaşı, 2026-cı il yanvarın 1-də Valle-del-Bove vadisinin şimal-qərb yamacında, təxminən 2 min metr yüksəklikdə baş verən hadisə nəticəsində yeni çat yaranıb.

Etna dəniz səviyyəsindən 3450 metr yüksəklikdə yerləşir və 2013-cü ildən etibarən, demək olar ki, fasiləsiz püskürmə vəziyyətindədir.