Avropa liderləri Trampa niyə qarşı çıxdılar? - Baku TV

ABŞ Prezidenti Donald Trampın Qrenlandiyadakı vəziyyətlə əlaqədar olaraq 8 Avropa ölkəsindən idxala tətbiq etdiyi yeni tariflər Avropa və ABŞ-ni yoxsullaşdıra bilər.

Bunu Avropa Komissiyasının sədri Ursula Fon der Lyayen “X” hesabında yazıb.

O bildirib ki, bu qərar ortaq rifahı sarsıdacaq və münasibətləri zəiflədəcək.

Bundestaq üzvü Sevim Dağdelen isə daha sərt bəyanat verib. O, ABŞ qoşunlarının və silahlarının Almaniyadan çıxarılmasını tələb edib.

S.Dağdelenin sözlərinə görə, Almaniyada ABŞ-nin ortamənzilli raketlərinin planlaşdırılan yerləşdirilməsi dərhal dayandırılmalıdır.

NATO-nun keçmiş baş katibi Anders Foq Rasmussen də məsələyə münasibət bildirib.

Onun fikrincə, D.Tramp Qrenlandiyadan real təhdidlərdən, o cümlədən Rusiyanın Ukraynaya qarşı apardığı müharibədən diqqəti yayındırmaq üçün “kütləvi yayındırma silahı” kimi istifadə edir.

“Məni həqiqətən narahat edən odur ki, hazırda bütün dünyanın diqqəti nə Avropa, nə də ABŞ üçün təhlükə yaratmayan məsələyə – ABŞ-nin dost müttəfiqi olan Qrenlandiyaya yönəlib. Halbuki indi əsas diqqət mərkəzində olmalı olan məsələ Rusiyanı Ukrayna ilə bağlı danışıqlar masasına necə oturtmaqdır”, – deyə Anders Foq Rasmussen əlavə edib.

Bu arada Danimarkanın paytaxtı Kopenhagendə Qrenlandiyaya dəstək aksiyası keçirilib. Nümayiş ABŞ prezidenti Donald Trampın ada ilə bağlı bəyanatına cavab xarakteri daşıyır. Aksiya iştirakçıları “Qrenlandiyaya toxunmayın”, “Qrenlandiya satılmır” şüarlarını səsləndirib, beynəlxalq hüquqa hörmət etməyə çağırıblar.