Avropada panika yaradan hadisə | Soyuducuları kim və niyə isidir? - Baku TV

Avropanın bir sıra ölkələrində supermarket şəbəkələrinin soyutma, dondurucu sistemlərində yenə də ciddi problemlər yarandı.

İsveç, Belçika və Lüksemburqda çoxsaylı mağazalarda temperaturun qəfil yüksəlməsi nəticəsində böyük həcmdə ərzaq məhsulları yararsız hala düşdü.

İsveç mediası, Stokholm da daxil olmaqla, ölkənin müxtəlif şəhərlərində fəaliyyət göstərən supermarket şəbəkələrinin soyutma sistemlərinin kiberhücumlara məruz qaldığını açıqladı. Məlumata əsasən, hücum nəticəsində soyuducu və donduruculardakı temperatur süni şəkildə yüksəldilib.

Hadisənin bir neçə Avropa ölkəsində qeydə alınması supermarketlərin rəqəmsal idarəetmə və soyutma sistemlərinin kibertəhlükəsizliyi ilə bağlı narahatlıqları artırıb.

Artıq həyəcan insanlar arasında da yayılıb. “The Telegraph” xəbər verir ki, Belçika, İsveç, İrlandiya, Lüksemburq və Estoniyada supermarketlərin hakerlərin hücumuna məruz qalmasından sonra Böyük Britaniyanın Milli Kibertəhlükəsizlik Mərkəzi mümkün hücumların qarşısını almaq üçün pərakəndə satış şəbəkələri ilə əməkdaşlıq etdiyini açıqladı. Hökumət fövqəladə hallara hazırlıq məqsədilə vətəndaşlara ən azı üçgünlük ərzaq və zəruri ehtiyat saxlamağı tövsiyə edir.