Azad olunan israilli girov Yəhya Sinvarın fotusunu atəşə tutub

HƏMAS vasitəçi ölkələrə təhlükəsizlik çağırışı edib.

Buna səbəb Qəzza zolağının cənubunda gizləndikləri tuneldən çıxmaq istəyən HƏMAS silahlılarının İsrail Ordusu tərəfindən atəşə tutulmasıdır.

İsrail tərəfi noyabrın 19-dan 26-na kimi HƏMAS-ın 20 silahlısının öldürüldüyünü açıqlayıb. Məqsəd onların tunel vasitəsilə qaçmasının qarşısını almaq olub.

Bununla yanaşı, HƏMAS-ın 8 yaraqlısı saxlanılıb. HƏMAS isə bütün baş verənlərə görə vasitəçi ölkələrə təhlükəsizlik çağırışı edib. Hətta etiraf olunub ki, HƏMAS silahlıları tunellərdə tələyə düşüblər. Bu, HƏMAS üzvlərininn tələyə, yaxud mühasirəyə düşdüklərini etiraf etdiyi ilk haldır.

İsrail mediasının məlumatına görə, 200-dək HƏMAS üzvü Rəfah ərazisindəki tunellərdə ilişib qalıb. Həmin zona İsrailin nəzarətində olduğu üçün qruplaşmanın üzvləri tunellərdən çıxmağa risk etmirlər.

HƏMAS-ın azad etdiyi israilli Eytan Mor isə odlu silahla HƏMAS lideri olmuş mərhum Yəhya Sinvarın fotosunu atəşə tutub. O bununla bağlı video bölüşüb.

Belə faktlar İsrail və HƏMAS arasında barışığın asan əldə olunmayacağına işarədir. Ekspertlərin fikrincə, məhz bu səbəbdən ABŞ Prezidenti Donald Trampın sülh planında HƏMAS-ın tərk-silah olunması əsas şərtlərdən biri kimi qeyd olunub.