Baqratın dəstəsi hərəkətə keçdi | Polislə etirazçılar arasında toqquşma

İrəvanda hüquq-mühafizə orqanları ilə “Vətən naminə Tavuş” hərəkatının iştirakçıları arasında toqquşma olub.

Polis Ermənistan hökumətinin binası qarşısındakı itaətsizlik aksiyası keçirənlərdən yolun hərəkət hissəsindən çıxmağı tələb edib, lakin kütlə buna tabe olmayıb.

Ölkənin Daxili İşlər Nazirliyinin məlumatına görə, toqquşma nəticəsində polis 10-dan çox aksiyaçını saxlayıb.

Onlar “Respublika” meydanında polisə müqavimət göstərərkən ələ keçirilib. Hüquq-mühafizə orqanlarının əməkdaşları həmçinin vətəndaşları ərazini tərk etməyə çağırsa da, bu, mümkün olmayıb. Bir qrup aksiya iştirakçısı isə hökumət binasının əsas girişini bağlamağa cəhd göstərib.

Qeyd edək ki, keşiş Baqrat Qalstanyanın rəhbərlik etdiyi etiraz aksiyaları bir aydan çoxdur davam edir.