Vəzifəyə yeni təyin olunmuş Arpine kimdir? | Yayılmış xəbərlər təsdiqləndi

“Ermənistan Daxili İşlər Nazirliyində ikihakimiyyətliliyin olması ilə bağlı çoxdan söhbətlər dolaşırdı və nazir müavini, DİN-in “danışan dili” hesab olunan Arpine Sarkisyanın nazir təyin olunması məlumatları faktiki olaraq təsdiqlədi”.

Bu barədə “Hraparak” nəşri yazıb.

Məlumata görə, 30 yaşlı yeni nazir “sorosçu”ların sevimlisi və ABŞ-nin Ermənistandakı səfirliyinin etibarlı adamlarından biridir. Onun ABŞ-nin Ermənistan polisində islahatlar üçün ayırdığı pulları koordinasiya etdiyi bildirilir. Bundan başqa, A.Sarkisyan nazir müavini işlədiyi dövrlərdə polis və miqrasiya xidmətlərini də idarə edib.

Nəşr yazır ki, Arpine Sarkisyan ilk peşəkar karyerasına Ədliyyə Nazirliyində ekspert vəzifəsində başlayıb. A.Sarkisyan polisin müxalifətçilərə qarşı sərt müdaxiləsinin tərəfdarı olub. Hətta bəzi məlumatlara görə, o, polisin aksiya iştirakçılarına qarşı zor tətbiqini də koordinasiya edib.

“Arpine Sarkisyan Nikol Paşinyan hökumətində Baş prokuror Anna Vardapetyan, Xarici Kəşfiyyat Xidmətinin rəhbəri, keçmiş deputat Kristina Qriqoryan və yeni təyin olunmuş ədliyyə naziri Srbui Qalyandan sonra dördüncü yüksək vəzifəli qadın məmurdur. Yeri gəlmişkən, bu qadınların hamısının qərbyönlü olduğu bildirilir və bu, əslində, dövlət idarəçiliyi sistemində əsas vəzifələrə xarici təsir daşıyıcılarının təyin edilməsi ilə bağlı proqnozları təsdiqləyir”, – nəşr qeyd edib.