Beynəlxalq axtarışda olan 56 nəfər həbs edildi

Azərbaycan da daxil olmaqla ümumilikdə 18 ölkənin İnterpol xətti ilə qırmızı bülletenlə beynəlxalq axtarışa verdiyi 56 nəfər Türkiyədə saxlanılıb.

Ölkənin daxili işlər naziri Ali Yerlikayanın rəsmi sosial media hesabından verdiyi xəbərə görə, axtarış tədbirləri Türkiyənin 11 bölgəsində "QƏFƏS-28” əməliyyatı çərçivəsində həyata keçirilib.

Nazirin sözlərinə görə, 56 nəfər ABŞ, Almaniya, Azərbaycan, BƏƏ, Belarus, Mərakeş, Fələstin, Hindistan, İsrail, İran, Qətər, Qazaxıstan, Moldova, Özbəkistan, Rusiya, Səudiyyə Ərəbistanı, Türkmənistan və İordaniya tərəfindən qırmızı bülletenlə axtarışa verilib.

Saxlanılan şəxslər çirkli pulların yuyulması, imiqrant qaçaqmalçılığı, narkotik ticarəti, rüşvət, insan alveri, oğurluq, dələduzluq kimi cinayət əməllərini törətməkdə təqsirli bilinirlər.