BMT dünya üzrə aclıq statistikasını açıqladı

Birləşmiş Millətlər Təşkilatı 2023-cü il üzrə aclıq hesabatını təqdim edib.

Sənədə görə, qlobal yaşayış səviyyəsi hazırkı sürətlə davam edərsə, 2030-cu ilin sonuna kimi 575 milyon insan hələ də ifrat yoxsulluq içində yaşayacaq. Bundan başqa, 84 milyon uşaq təhsildən kənarda qalacaq. Eyni zamanda 2015-ci ildə dünya liderləri tərəfindən 7 milyarddan çox insanın həyatının yaxşılaşdırılması məqsədilə qəbul edilən geniş əsaslı hədəfdən yalnız 15%-nə nail olunacaq.

Qeyd edək ki, 2030-cu ilə qədər həyata keçirilməsi nəzərdə tutulan hədəflərə aclığa son qoyulması, hər bir uşağın keyfiyyətli ibtidai və orta təhsillə təmin edilməsi, gender bərabərliyinə nail olmaq, bütün insanların təmiz içməli su ilə təmin edilməsi və s. kimi məsələlər daxildir.

BMT Baş katibinin iqtisadi və sosial məsələlər üzrə müavini Li Junhuanın sözlərinə görə, Rusiya-Ukrayna müharibəsi, iqlim dəyişikliyi COVID-19 pandemiyasının təsirləri kimi problemlər qurumun hədəflərinə çatmasında çətinlik yaradır.

Təşkilatın Baş katibi Antonio Quterreş isə bildirib ki, bu sahədə heç bir inkişafa nail ola bilməmək dünyada hökm sürən bərabərsizliklərin daha da dərinləşməsinə səbəb olacaq və dünyanın iki hissəyə parçalanma riskini bir az da artıracaq.