BMT-nin Baş katibi tərəfləri danışıqları bərpa etməyə çağırıb - Baku TV

BMT-nin Baş katibi Antonio Quterreş Fars körfəzində hərbi qarşıdurmanın yenidən başlamasından narahatlığını bildirərək, sonrakı eskalasiyanın İranla ABŞ arasında diplomatik irəliləyişi poza biləcəyi barədə xəbərdarlıq edib.

BMT Baş katibinin rəsmi nümayəndəsi Stefan Düjarrikin sözlərinə görə, Quterreş tammiqyaslı hərbi əməliyyatlara qayıtmağın region xalqları, beynəlxalq sülh və təhlükəsizlik, eləcə də dünya iqtisadiyyatı üçün fəlakətli nəticələrə səbəb olacağı barədə xəbərdarlıq edib.

Baş katib bütün tərəfləri maksimum təmkinlilik göstərməyə, gələcək eskalasiyadan çəkinməyə, danışıqları mümkün qədər tez bərpa etməyə və mövcud fikir ayrılıqlarının diplomatik yolla həllinə çağırıb.

Qeyd edək ki, ABŞ Silahlı Qüvvələrinin Mərkəzi Komandanlığı İrana qarşı yeni genişmiqyaslı zərbələrin başladığını açıqlayıb. Bu barədə qurumun mətbuat xidməti "X" sosial şəbəkə hesabında məlumat yayıb. ABŞ tərəfi bildirir ki, bu əməliyyatlar İranın Hörmüz boğazı ərazisində üç mülki gəmiyə endirdiyi zərbələrə cavab tədbiridir.

Digər tərəfdən, İran mediası ölkənin cənubundakı Sirik şəhərində yeddi, Bəndər-Abbas şəhərində isə altı partlayışın baş verdiyini bildirib. Zərbələrin nəticələri barədə hələlik ətraflı məlumat yoxdur. Xəsarət alanlarla bağlı da hər hansı bir məlumat verilmir.