Böyük Britaniya Tehranı niyə hədələdi? - İran 3 ölkə səfirini XİN-ə çağırdı ki...

Almaniya və Fransanın İrandakı səfirləri, həmçinin Britaniyanın İrandakı müvəqqəti işlər vəkili İran Xarici İşlər Nazirliyinə çağırılıb.

Bu barədə İran mediası məlumat yayıb.

Səfirlərin BMT Təhlükəsizlik Şurasının İranın nüvə proqramı ilə bağlı keçirdiyi qapalı iclasa etiraz olaraq çağırıldıqları bildirilib.

İran Xarici İşlər Nazirliyinin Beynəlxalq Sülh və Təhlükəsizlik Baş direktorluğu bu üç ölkəni məsuliyyətsiz və təxribatçı yanaşmada ittiham edib və kəskin etirazını bildirib.

“İranın nüvə proqramı ilə bağlı Təhlükəsizlik Şurasının qapalı iclasının keçirilməsi heç bir texniki və hüquqi əsasa malik deyil və ABŞ-nin birtərəfli və gərginlik yaradan yanaşmalarına uyğun olaraq təxribat və siyasi hərəkət hesab olunur”, – İran XİN-i bildirib. Qeyd edək ki, martın 13-də İranın nüvə proqramı ilə bağlı iclas Şuraya üzv olan 15 ölkədən altısının, o cümlədən ABŞ, Böyük Britaniya, Fransa, Cənubi Koreya, Yunanıstan və Panamanın tələbi ilə keçirilib.

İclasda Təhlükəsizlik Şurasından İranın yüksək səviyyədə uran zənginləşdirilməsinə qarşı çıxmağa, Tehranı qınamağa çağırıb, Böyük Britaniya isə İranı tətik mexanizmini fəallaşdırmaqla hədələyib.