Kişiləri döyməyi biznesə çevirən qadın | “2027-ci ilədək ən azı 1000 kişini...”

Uqandalı kontent istehsalçısı Aleti Kristal verdiyi müsahibədə 2027-ci ilə qədər 1000 kişini "döyməyi" qarşısına məqsəd qoyduğunu bildirib.

"The Ugandan Boy Talk Show" proqramına danışan Kristal bu fəaliyyətinin qadınlara qarşı zorakılıq edən kişilərə yönəldiyini deyib. Onun sözlərinə görə, sevgililərinə və ya həyat yoldaşlarına fiziki zorakılıq göstərən kişiləri "cəzalandırmaq" üçün xüsusi bir təşkilat yaradıb.

"Bu səbəbdən yaxın vaxtlarda kişiləri döydüyüm bir iş qurmuşam. Əgər zorakılıq münasibətindəsənsə, sevgilin səni aldadırsa, dələduzluq edirsə və ya sənə əl qaldırırsa, mənə müraciət et", – deyə o bildirib.

Aleti Kristal bu fəaliyyətin kifayət qədər gəlirli olduğunu və ona kontent istehsalından daha çox qazanc gətirdiyini də vurğulayıb:

"Bu iş mənə, həqiqətən də, kontent istehsalından qazandığımdan daha çox pul qazandırdı. Çoxlu müştərim var və buna görə minnətdaram. Ona görə də onları layiqincə döyürəm. Mənimlə çalışan bir komandam da var. Gecənin bir yarısı zəng edib bir kişini döyməyimi istəməyiniz kifayətdir. 2027-ci ilə qədər ən azı 1000 kişini döyməyi hədəfləyirəm. Bir iş qadını olaraq bunu bacarıramsa, bu mənim üçün kifayətdir", – deyə o əlavə edib.

Kristal bildirib ki, bu fəaliyyət kişilərin qadınlara qarşı zorakılıq etməzdən əvvəl iki dəfə düşünməsinə səbəb ola bilər. O həmçinin zorakılıq edən şəxslərin qanun qarşısında cavab verməsi üçün gələcəkdə polis ilə əməkdaşlıq etməyi planlaşdırdığını da qeyd edib.