Böyük Britaniyanın nüvə silahı daşıyıcıları İsveçdə yerləşdiriləcək?

Böyük Britaniya İsveçə öz “nüvə çətiri”ni təqdim etmək imkanını müzakirə edir.

Bu barədə “The Daily Telegraph” qəzeti Böyük Britaniyanın Baş naziri Kir Starmerin ofisinə istinadən məlumat yayıb.

Nəşrin yazdığına görə, nüvə çəkindirməsi ilə bağlı məsələ Britaniya hökumətinin başçısı ilə İsveçin Baş naziri Ulf Kristersson arasında telefon danışığı zamanı müzakirə olunub. Bildirilir ki, danışıqlar hazırda ilkin mərhələdədir.

Hələlik Böyük Britaniyanın nüvə silahı daşıyıcılarının İsveç ərazisində daimi və ya müvəqqəti yerləşdirilməsi məsələsinin müzakirə edilib-edilmədiyi, yoxsa yalnız mümkün münaqişə zamanı Stokholmun Londonun nüvə potensialından istifadə etməsinə təminat verilməsinin nəzərdə tutulduğu dəqiqləşdirilməyib.

Qəzet qeyd edir ki, 2024-cü ilin martında NATO-nun tamhüquqlu üzvünə çevrilən İsveç oxşar müzakirələri Fransa ilə də aparır.

Məlumata görə, Böyük Britaniyanın nüvə silahları “Vanguard” tipli dörd sualtı qayıqda yerləşdirilib və bu gəmilər ABŞ istehsalı olan “Trident II” ballistik raketləri daşıyır. 2025-ci ilin iyununda Starmer Londonun ABŞ-dən “B61-12” taktiki termonüvə bombalarını daşımaq imkanına malik 12 ədəd “F-35A” qırıcısı alacağını elan etmişdi.