Brüssel sazişinin mətni hələlik açıqlanmayıb

Avropa İttifaqının səfirləri Ukrayna üçün 90 milyard avro məbləğində kreditin detallarını təsdiqləyiblər.

İttifaq liderləri tərəfindən dekabr ayında razılaşdırılmış təşəbbüsün məqsədi 2026–2027-ci illərdə Kiyevin maliyyə ehtiyaclarının böyük hissəsini ödəmək və müharibə aparılmasını təmin etməkdir.

“Reuters” agentliyi xəbər verir ki, səfirlər Brüsseldə keçirilmiş qapalı iclasda bu barədə razılaşma əldə ediblər.

Sazişin mətni hələlik açıqlanmayıb, lakin Avropa İttifaqı Şurasının bəyanatında bildirilib ki, vəsaitlərin üçdə ikisi hərbi yardıma, üçdə biri isə ümumi büdcənin dəstəklənməsinə yönəldiləcək.

“Prinsip etibarilə müdafiə məhsulları yalnız Avropa İttifaqında, Ukraynada və ya Avropa İqtisadi Məkanı – EFTA ölkələrində yerləşən şirkətlərdən alınmalıdır. Əgər Ukraynanın hərbi ehtiyacları İttifaqda, Ukraynada və ya Avropa İqtisadi Məkanı – EFTA ölkələrində mövcud olmayan müdafiə məhsullarının təcili tədarükünü tələb edərsə, müəyyən istisnalar tətbiq olunacaq”.