Bu, bir kabus idi | Azadlığa buraxılan fələstinli məhbuslar danışdı

İsraillə HƏMAS silahlı qruplaşması arasında atəşkəsin tətbiqi və Qəzza zolağında saxlanılan girovların azad edilməsi ilə bağlı razılaşma çərçivəsində 90 fələstinli məhbus azad edilib.

İsrail Həbsxanalar Xidmətinin məlumatına görə, fələstinli məhbuslar 3 israilli girovun sərbəst buraxılması müqabilində qarşı tərəfə təhvil verilib.

“Ağır hisslərdir, danışmaq çətindir. Bu, bir kabus idi. Bu azadlığa görə hər kəsə təşəkkür edirik. Amma buna baxmayaraq, içimizdə şəhidlərin itkisinin acısı var. Biz hər kəsə tezliklə azadlıqlarına qovuşa bilmələrini arzu edirik. Atəşkəsin ömürlük olacağına inanmaq istəyirik”, – azad edilən fələstinli məhbus söyləyib.

Fələstinli məhbuslar İsrail həbsxanasındakı şəraitdən və onlara göstərilən rəftardan da danışıblar:

“İsrail həbsxanasında həyat üçün zəruri olan heç nə yox idi: nə sanitar qovşaq, nə çarpayı, nə gigiyena vasitələri. Mən əminəm ki, hazırda məhbus kimi saxlanılan həmvətənlərim yemək, təmizlik ləvazimatlarından və insani hüquqlardan məhrum halda saxlanılırlar. Həbsxanada vəziyyət xaotikdir, həbsxanadaxili şəraitə, məhbusların çəkdiyi əziyyətlərə diqqət yetirmək lazımdır. Onlar bizimlə qeyri-insani rəftar edirdilər. Amma şükürlər olsun ki, viran olmuş olsa da, evimizə qayıtdıq”.