Budapeşt Avropa İttifaqına meydan oxuyur

Macarıstan Ukraynaya maliyyə dəstəyinin göstərilməsinə qəti şəkildə qarşı çıxır və bu məqsədlə Avropa İttifaqı çərçivəsində müzakirə olunan təşəbbüsləri dəstəkləməyəcəyini bəyan edir.

Macarıstanın xarici işlər naziri Peter Siyarto bildirib ki, rəsmi Budapeşt Ukraynanın maliyyələşdirilməsi üçün bir avro belə ayırmaq niyyətində deyil və Qərbin dondurulmuş Rusiya aktivlərindən istifadə etməsinə qarşı çıxır.

Nazirin sözlərinə görə, Avropa İttifaqının bəzi üzv ölkələri dondurulmuş Rusiya aktivlərindən istifadə edərək Ukraynaya böyük həcmdə maliyyə vəsaiti toplamağa çalışır. Siyarto bu addımı beynəlxalq hüquqazidd və son dərəcə təhlükəli presedent kimi qiymətləndirib.

O vurğulayıb ki, hazırda davam edən sülh danışıqları münaqişənin diplomatik yolla həllinə müəyyən ümidlər yaratsa da, Rusiya aktivlərinə müdaxilə bu prosesi zəiflədə və gərginliyi daha da artıra bilər.

“Avropa İttifaqı faktiki olaraq Rusiya aktivlərinə tamamilə qanunsuz şəkildə əl qoyur. Bu isə münaqişənin daha da genişlənməsi, hərbi əməliyyatların davam etməsi, hətta güclənməsi riskini artırır”, – deyə Peter Siyarto qeyd edib.

Nazir əlavə edib ki, Macarıstan hökuməti öz vətəndaşlarının maraqlarını əsas götürərək belə qərarların əleyhinə çıxır.

Onun sözlərinə görə, ölkə rəhbərliyi Macarıstan xalqının vergiləri hesabına Ukrayna dövlət aparatının saxlanılmasını, ordunun silahlandırılmasını və ya müharibənin davam etdirilməsini qəbuledilməz sayır.

“Açıq şəkildə bildirdim ki, biz Macarıstan xalqının pulunun bir avrosunu belə Ukrayna dövlətinin fəaliyyətinə, Ukrayna Ordusunun silahlanmasına, bu müharibənin uzadılmasına xərcləməyə hazır deyilik”, – deyə nazir vurğulayıb.