Bunlar pərdəarxası oyundur | Kadırovdan Çeçenistanı silkələyən hadisəyə reaksiya

Çeçenistanın rəhbəri Ramzan Kadırov Özbəkistan rəsmilərinə sui-qəsd hazırlamaqda şübhəli bilinən iki yerli Çeçenistan vətəndaşının axtarışa verilməsi ilə bağlı xəbərləri şərh edib.

Podrobno.uz saytı xəbər verir ki, R.Kadırov sui-qəsdin özünü şübhə altına alıb, qurbanları hədələyib və bütün bunların Qərbin pərdə arxası oyunu olduğunu irəli sürüb.

R.Kadırov qeyd edib ki, Özbəkistan Prezident Administrasiyasının informasiya siyasəti şöbəsinin keçmiş rəhbəri Komil Allamjonovun avtomobilinin atəşə tutulmasını sui-qəsd adlandırmaq çətindir.

Bundan əlavə, o, iş üzrə məhkəmə prosesinin başlanmasından iki ay sonra birdən-birə “eyni cəhd”in digər uğursuz qurbanı rolunda üzə çıxan Qabaqcıl Layihələr üzrə Milli Agentliyin rəhbəri Dmitri Li haqqında danışıb.

Çeçenistan rəhbəri bu işlə məşğul olan müstəntiqlər barədə daxili yoxlama aparmağa çağırıb. O həmçinin Komil Allamjonov və Dmitri Liyə qurban rolunu oynamamağı tövsiyə edib.

“Əks təqdirdə bütün intriqalara, böhtanlara və spekulyasiyalara görə cavab verməli olacaqsınız, indi isə adət-ənənələrimizə uyğun olaraq cavabdan danışıram”, – R.Kadırov onları təhdid edib.

Bundan əlavə, R.Kadırov bu işdə “çeçen izi” ilə bağlı fərziyyələri bir daha rədd edərək deyib:

“O zaman dedim, indi də deyirəm: bunu hazırlasaydım, işi elə həmin gündə bitirərdim, mənim haqqımda belə pis fikirdə olmamalı idiniz”.

Onun sözlərinə görə, Özbəkistanda nüfuz qazanmaq üçün heç nə etməyə ehtiyac yoxdur.

Xatırladaq ki, K.Allamjonovun avtomobilinin atəşə tutulması ilə bağlı insident oktyabrın 26-da Qibrayda baş verib. Heç kim xəsarət almayıb. Daha sonra təhlükəsizlik qüvvələri bir neçə şübhəlini saxlayıb. Bir ay sonra Çeçenistandan olan Bislan Rasayev və Şamil Temirxanov bu işlə bağlı beynəlxalq axtarışa verilib.

R.Kadırov bu hekayəni “pərdə arxası oyunlar” adlandırıb. Onun sözlərinə görə, bu fonda “qərbyönlü media” Özbəkistan Prezidenti Şavkat Mirziyoyevin ailəsi daxilində hansısa konfliktdən danışmağa başlayıb.

“Cəhd”lə bağlı yaranan səs-küy fonunda bəzi media qurumları ehtiyatla Prezidentin qızı və kürəkəninin hakimiyyətə iddialı ola biləcəyi ilə bağlı başqa bir xəbər hazırlayıb”, – R.Kadırov yazıb.

Sonda Çeçenistan rəhbəri Mirziyoyev ailəsini “bəyanat verməyə və bütün çirkin şayiələri dağıtmağa” çağırıb.