Çində 8-ci əsrə aid tapıntı | 2 illik bərpa işindən sonra yenisindən seçilməyən tac

Çində VIII əsrə aid qızıl tac görənləri heyran edir.

Bunun səbəbi tapıntının tək gözəlliyi ilə yanaşı, həm də xüsusi dəqiqliklə bərpasıdır. Çünki iki il davam edən dəqiq və incə bərpa işlərindən sonra tac əvvəlki görkəmini yenidən qazanıb və üzərində demək olar ki, heç bir bərpa izi müşahidə edilmir

Qızıl tac 2019-cu ildə Çinin şimal-qərbində yerləşən Tsinxay vilayətində aşkarlanıb. Güclü korroziya və çatlamaya məruz qalmış tapıntı öz ilkin formasını da itirmişdi. Tacın tapıldığı zaman dağılmış və parçalanmış vəziyyətdə olması bərpaçıların qarşısında ciddi problemlər yaradıb.

Arxeoloqların ilk vəzifəsi metalın struktur möhkəmliyini bərpa etmək olub. Tacın ipək astarı isə tamamilə çürümüşdü. Mədəni irs üzrə mütəxəssislər bu astarı orijinal formasına uyğun olaraq autentik materiallar və ənənəvi tikiş texnikaları ilə bərpa ediblər.

Xüsusilə diqqətəlayiq məqamlardan biri də rəngləmə prosesi olub. Burada meşə palamudu və indiqo istifadə olunmaqla köhnəlmiş effekt yaradılıb və yeni astar qədim artefaktla tam uyğunlaşdırılıb. Hətta ən təcrübəli sənətkarlar belə bərpa izlərini ayırd edə bilmirlər. Bu da Çində Tibet Tubo Krallığına aid bir tacın ilk uğurlu bərpası kimi tarixə düşüb.