CNN-dən Zelenski və Zalujnı barədə sensasiyalı açıqlama

Ukrayna Silahlı Qüvvələrinin Baş komandanı Valeri Zalujnı müharibə ilə bağlı Prezident Volodimir Zelenski ilə arasındakı fikir ayrılıqlarına görə qarşıdakı günlərdə vəzifəsindən azad ediləcək.

Bu barədə CNN-ə adı açıqlanmayan iki mənbə bildirib.

Məlumata görə, general yanvarın 29-da Prezidentin ofisindəki görüşə çağırılıb və ona işdən çıxarılacağı barədə məlumat verilib. Qeyd olunub ki, V.Zalujnının işdən çıxarılması rəsmi şəkildə elan edilməyib, lakin Prezidentin müvafiq fərmanı həftənin sonunadək imzalaması gözlənilir.

Saytın iddiasına görə, müdafiə naziri Rustem Umerovun da iştirakı ilə yanvarın 29-da Prezidentin ofisində keçirilən kiçik toplantıda V.Zelenski V.Zalujnını vəzifəsindən azad etməyə qərar verdiyini bildirib. Qeyd olunub ki, dövlət başçısı ona başqa vəzifə təklif edib, lakin o, bundan imtina edib.

Adı açıqlanmayan mənbələr generalın yerinə yeni namizədlərin nəzərdən keçirildiyini də qeyd ediblər. Bildirilib ki, bunlardan biri V.Zelenski ilə yaxın əlaqələri olan və yeni nəsil hərbi liderləri təmsil edən Baş Kəşfiyyat İdarəsinin rəhbəri, 38 yaşlı general Kiril Budanovdur.

Qeyd olunub ki, V.Zalujnının vəzifəsindən uzaqlaşdırılması 2 il öncə Rusiya ilə tammiqyaslı müharibənin başlamasından sonra ən böyük hərbi qalmaqaldır. Məlumata görə, tərəflər arasında gərginlik Silahlı Qüvvələrin komandanının ötən ilin noyabrında “The Economist”ə müsahibəsində Rusiya ilə müharibənin dalana dirəndiyini deməsindən sonra artıb.

Xatırladaq ki, bir müddət öncə Prezidentin sözçüsü Sergey Nikiforov general Valeri Zalujnının vəzifəsindən azad edilməsi ilə bağlı yayılan məlumatları təkzib edərək V.Zelenskinin belə bir əmr imzalamadığını bildirmişdi.