Danimarka ölkə tarixinin ən böyük hərbi təlimlərinə start verdi

Danimarka artıq üç əsrdir ki, suveren dövlət kimi Qrenlandiyaya nəzarət edir, lakin indi ölkə görünməmiş təhlükələrlə üz-üzədir.

Danimarka hərbçiləri hesab edirlər ki, Rusiya Ukraynada müharibəni bitirdikdən sonra topladığı təcrübəni Arktikada tətbiq edərək bölgədə daha böyük təhdid yarada bilər.

CNN-in məlumatına görə, eyni zamanda Çin də bölgədə iddialarını artırır. Pekin Rusiya ilə birgə patrul və təlimlərdə iştirak edir, Arktikada infrastruktur layihələrinə maliyyə yatırır və "qütb ipək yolu" adlandırılan dəniz ticarət marşrutunu inkişaf etdirməyə çalışır. Çin rəsmiləri hətta özlərini "Arktika ilə həmsərhəd dövlət" adlandırır, baxmayaraq ki, ölkənin ən şimaldakı böyük şəhəri Harbin İtaliyanın Venesiyası ilə eyni en dairəsində yerləşir.

Qeyd edək ki, Danimarka hazırda tarixində ən böyük hərbi təlimlərini keçirir. Arktikanın müdafiəsinə 2 milyard dollardan çox əlavə vəsait ayırır, xüsusi təyinatlı qüvvələr yaradır, yeni hərbi gəmilər və uzaqmənzilli pilotsuz uçuş aparatları alır. Bu addımların səbəbi həm də Vaşinqtonun strateji maraqları ilə bağlıdır.