Dinozavrların mənşəyi ilə bağlı Britaniya alimlərindən maraqlı araşdırma

Təbaşir dövrünün sonlarında Şimal yarımkürəsinin faunasına əsasən tiranozavrlar, hadrozavrlar və keratopslar üstünlük təşkil edib.

Uzun müddət tiranozavrın yalnız Şimali Amerikaya məxsus dinozavr olduğu düşünülürdü. Lakin britaniyalı alimlər tərəfindən aparılan yeni tədqiqat bu nəhəng yırtıcıların əcdadlarının Asiyadan gəldiyini ortaya çıxarıb.

Tədqiqatçılar süni intellekt modelləşdirilməsindən istifadə edərək tiranozavrların mənşəyini analiz ediblər. Nəticələrə əsasən, qədim tiranozavrlar təxminən 70 milyon il əvvəl Asiyanı Şimali Amerika ilə birləşdirən quru körpüsü ‒ hazırkı Berinq boğazı üzərindən keçərək yeni ərazilərə yayılıblar.

Araşdırmada təkcə fosillərin yerləşmə yerləri deyil, həm də dinozavrların təkamül əlaqələri, Təbaşir dövrünün coğrafiyası və iqlim şəraiti, eləcə də fosil qeydlərindəki boşluqlar nəzərə alınıb ki, bu da nəticələrin daha dəqiq olmasına imkan verib.

Tədqiqatda meqaraptorlar da araşdırılıb. Bu dinozavrlar uzun barmaqları və 35 santimetrə çatan qarmaqlı caynaqları ilə seçilirdilər. Alimlər onların düşünüldüyündən daha geniş ərazidə yayılmış olduğunu müəyyənləşdiriblər.

Qeyd olunub ki, kontinentlər ayrıldıqda bu nəhəng yırtıcıların təkamül yolları da fərqlənib. Nəticədə tiranozavrlar Asiya kimi regionlarda meqaraptorların yerini tutsalar da, Avstraliya və Pataqoniya kimi ərazilərdə meqaraptorlar öz ekosistemlərində üstün yırtıcıya çevriliblər.