Dinozavrlarla eyni mühiti paylaşan canlılarla bağlı faktlar | Alimlərdən açıqlama

Milyonlarla il əvvəl yaşamış pterozavrların quruya uyğunlaşması ilə bağlı yeni elmi nəticələr ortaya çıxıb.

Lester Universitetinin alimləri müxtəlif yerlərdə tapılmış pterozavrlara aid daşlaşmış izləri 3D modelləmə vasitəsilə yenidən qurublar. Bu cür izlər pterozavrların nəinki harada yaşadıqlarını və necə hərəkət etdiklərini, həm də onların davranışı və gündəlik fəaliyyəti haqqında nadir məlumatlar təqdim edir.

Tədqiqatçılar bu uçan sürünənlərin təqribən 160 milyon il əvvəl "ekoloji dəyişiklik" keçirdiyini və nəticədə daha çox vaxtlarını quruda keçirməyə başladığını müəyyənləşdiriblər.

Araşdırma zamanı əldə edilən izlər göstərir ki, hətta ən iri pterozavrlardan olan və qanad açıqlığı 10 metrə çatan "Ketsalkoatlus" belə yalnız havada yaşamayıb. Bu növün izlərinə həm sahil, həm də kontinental ərazilərdə rast gəlinib. Bu, onların çox vaxtlarını quruda keçirən canlılar olduğunu və dinozavrlarla eyni mühiti paylaşdıqlarını sübut edir.

Mütəxəssislərin fikrincə, bu pterozavrlar əslində düşündüyümüzdən daha çox yayılıblar, sadəcə skelet qalıqları çox az tapılıb.