Yerin dərin qatlarında müşahidə edilib

66 milyon il əvvəl dinozavrların kütləvi məhvinə səbəb olduğu hesab edilən Çikşulub asteroidinin Yerə toqquşmasının təsirləri planetin dərin qatlarında bu gün də müşahidə olunur.

Yeni geofiziki tədqiqat zamanı alimlər seysmik tomoqrafiya məlumatlarını təhlil edərək asteroid zərbəsinin yaratdığı güclü enerji dalğalarının Yerin mantiyasının dərin qatlarına qədər nüfuz etdiyini müəyyən ediblər.

Araşdırma nəticəsində mantiyada həmin toqquşma ilə əlaqələndirilən geoloji anomaliyaların izləri aşkarlanıb.

Tədqiqatçıların sözlərinə görə, Çikşulub asteroidinin Yerə çırpılması planet tarixində ən güclü kosmik toqquşmalardan biri olub. Məhz bu hadisənin nəticəsində dinozavrlar da daxil olmaqla, Yer üzündəki canlı növlərinin təxminən 75 faizi məhv olub.

Alimlər bildirirlər ki, yeni nəticələr asteroid zərbələrinin təkcə Yer səthinə deyil, həm də planetin daxili quruluşuna uzunmüddətli təsir göstərdiyini nümayiş etdirir. Bu kəşf böyük kosmik cisimlərin planetlərin geoloji təkamülündə oynadığı rolu daha yaxşı anlamağa imkan verəcək.

Mütəxəssislər hesab edirlər ki, əldə olunan məlumatlar gələcəkdə həm Yerin geoloji tarixinin, həm də Mars və digər qayalı planetlərdə baş vermiş oxşar toqquşmaların araşdırılmasına töhfə verə bilər.