Dünyanın ən qeyri-adi qaydaları olan şəhər

Arktika dairəsinin dərinliklərində, Norveçin Svalbard arxipelaqında Lonqyirbyen şəhəri yerləşir. Burada təxminən 2512 nəfər yaşayır. Şəhərin ərazisi cəmi 10,4 kvadratkilometrdir, lakin rahat həyat üçün lazım olan hər şey var: uşaq bağçası, məktəb, kilsə, poçt, restoran və hətta muzey.

Maraqlısı odur ki, şəhərdə yalnız bir ərzaq mağazası fəaliyyət göstərir. Lonqyirbyenin özünə məxsus qaydaları var. Məsələn, burada pişik saxlamaq olmaz, həmçinin hər bir sakin ay ərzində müəyyən edilmiş sayda spirtli içki ala bilər.

Bundan başqa, şəhərdə ölən insanların dəfn edilməsi qadağandır. Buna görə də ağır xəstələrə adətən materikə köçmək tövsiyə olunur.

Dəfn qadağası 1950-ci ildə tətbiq edilib. Buna səbəb 1918-ci il qrip epidemiyası zamanı ölən insanların qalıqlarının güclü soyuq səbəbindən hələ də parçalanmadığının aşkarlanması olub. Bu vəziyyət basdırılan qalıqlarda hələ də təhlükəli virus ştamlarının qala biləcəyi ilə bağlı narahatlıq yaradıb.

Sərt iqlimə və ilboyu mənfi temperaturlara baxmayaraq, şəhər mühüm elmi və təhsil mərkəzinə çevrilib. Turizm də region iqtisadiyyatında getdikcə daha böyük rol oynayır.