Ekstremal istilər Avropanın bir sıra ölkələrində yeni rekordlar yaradıb - Baku TV

Polşada anomal istilər səbəbindən yeni temperatur rekordu baş verib.

Hadisə ölkənin şimalında yerləşən Torun şəhərində qeydə alınıb.

Torun şəhərində havanın temperaturu 40,3 dərəcəyə yüksələrək ölkə tarixində yeni rekord həddə çatıb. Məlumata görə, Polşada bundan əvvəlki rekord temperatur 105 il əvvəl – 29 iyun 1921-ci ildə qeydə alınıb. Həmin vaxt ölkənin qərbindəki Proşkov şəhərində termometrlər 40,2 dərəcəni göstərib. Torundakı son göstərici ilə bir əsrlik rekord yenilənmiş olub.

Müşahidə olunan həddindən artıq bürkü və yüksək temperatur səbəbindən Polşada meteoroloji təhlükə səviyyəsi artırılıb. Belə ki, ölkə ərazisində rəsmi olaraq ikinci və üçüncü ən yüksək səviyyəli xəbərdarlıq elan edilib.

Litvada da davam edən anomal istilər səbəbindən əhali ziyan çəkməyə başlayıb. 35 dərəcəyə çatan isti havada qorunmağa çalışanlardan altısı üz tutduqları göllərdə boğulublar. Belə havaya alışmayan insanlar arasında ciddi ürək-damar problemləri yaşanmaqdadır. Yüzlərlə insan tibb məntəqələrinə müraciət edir.

Sinoptiklərin verdiyi məlumata görə, anomal isti hava şəraiti davam edəcək. Quraqlıq səbəbindən isə çaylarda suyun səviyyəsi aşağı düşüb və bu da suvarmada çətinliklər yaradıb. Yüksək istilərin davam etməsindən bəzi şəhərlərdə orta məktəblər artıq tətilə bağlanıb.